Preghiera del Giovedì Santo
Origine: Zafferana Etnea (CT)
Lu Jovi Essantu
Lu Jovi Essantu, lu jovi ammatinu
la Matri Santa si misa 'ncamminu;
ppà strata l'ancuntrau san Giuvanni:
- "C'aviti Matri ca iti ciancennu".
- "Ah, c'haiu aviri, figghiu miu Giuvanni,
c'avemu persu lu nostru Signuri".
- "O iti 'nda dda casa di Pilatu,
ddani lu truviriti 'ncatinatu".
- "Tuppi tuppi"
- "Cu jè a stu putticatu?"
- "Sarà d'addulurata di mo Matri.
Matruzza bedda non vi pozzu apriri
Ca sugnu 'nchiuvatu ccù chiova e catini".
- "Figghiu! Cu ti li misa sti catini?".
- "Mi li misa lu cchiù 'ranni malfatturi!".
- "Famminni fari 'npariceddu a mia,
non tantu longhi e non tantu crudeli,
c'hanu a passari carnuzzi gentili".
Rispusi lu cchiù 'ranni malfatturi:
- "Longhi e pungenti li sapemu fari!".
A Madonna comu 'ntisa st'attirruri
Ficia trimari cielu, terra e mari.