Preghiere dei morenti
Origine: Vita (TP)
CENTU CRUCI [1]
(Si recita cento volte)
Gesù, centu cruci vulia diri,
chi Diu mi detti a diri e cuncipiri.
Passannu pi' lu ponti,
corpu meu spirituali,
arma mia a' ricurdari
quannu chi mi partivi di chidda via;
mi cunfissai, mi comunicai,
li centu cruci mi li dissi,
mi li dissi a memoria mia
lu jornu di la Vergini Maria
CENTU CRUCI [2]
(Da recitare in punto di morte, o il 25 marzo, giorno dell'annunciazione)
Gesù, li centu cruci vurria diri
si Diu mi lassa diri e cuncipiri
Pi ddu battisimu chi appi a lu fonti
passerò un terribili ponti.
Arma mia di penitenza,
corpu meu spirituali,
N.N. (nome del morituro)
di chistu munnu a chiddu munnu a trapassari.
Na chistu munnu mi partii, mi cunfissai,
mi cumunicai,
li centu cruci mi li dissi:
l'Angilu Raffaeli (Gabrieli) mi li scrissi,
e mi li scrissi Maria mia, (e mi li scrissi 'memoria mia)
lu jornu di la biata Virgini Maria.
Origine: Vita (TP)
Pi patiri, patiri pi Diu,
pi muriri muriri pi lu Signuri,
eu v'abbrazzu, o miu Redenturi,
pi muriri abbrazzatu cu vui.