Alla Sera
Origine: Vita (TP)
ALLA SERA [1]
Eu mi curcu na stu' lettu
e Maria è na lu me' pettu.
C'aiu cosa m'arrispigghiu,
m'arrispigghiu cu lu so' mantu;
lu Patri, lu Figghiu e lu Spiritu Santu.
ALLA SERA [2]
Eu mi curcu na stu' lettu,
quattru santi attrovu eu:
dui a li peri e dui a capizzu;
'mmezzu c'esti Gèsu Cristu
e mi dici "dormi, arriposa,
nun pinsari nudda cosa".
ALLA SERA [3]
Eu mi curcu na stu lettu
cu l'ancilu na lu pettu,
cu l'ancilu 'ncantannu
e Gesuzzu 'mpriricannu
Dui a li peri, dui a capizzu
mmezzu Gesu Crucifissu,
eu mi curcu pi' durmiri
nun lu sacciu se ' muriri
Eu du cosi ci addumannu
l'arma mia ci arraccumannu:
la Marunnuzza me' matri,
San Giusippuzzu me' patri.
L'anciuleddi mi vennu fratuzzi,
li Serafini mi vennu cucini;
mentri ci avemu st'amuri filici
facemu la cruci e partemu a durmiri.
ALLA SERA [4]
Na stu lettu mi curcu eu
e quattru ancili ci attrovu eu:
dui a li peri e dui a capizzu,
mmezzu Gèsu Crucifissu.
Mmezzu la casa la cruci vattiata,
'ncapu li casi l'ancilu chi trasi,
darrè la porta mia
c'è la Virgini Maria.
Appuntiddu la porta mia
cu lu puntiddu di Santa Maria,
e di dintra pari porta
e di fora pari rocca.
E si vennu li me' nimici,
nun ci attrovanu la porta mia.