Lu disprezzu di lu Munnu
Quantu è pazzu cui ama lu munnu:
Sempri peni, e amarizzi ci su,
Campa e mori felici, e cuntenti
Sulamenti cui ama a Gesù.
Armi giusti parrati, e diciti
S’è minzogna, o s’idd’è verità
Ca cui lassa lu munnu fallaci
Sempri in paci, e cuntenti si sta,
Li tormenti, li penu, la morti,
Centu mali, e cent’autri di chiù
Ad un’arma, unni c’è lu Signuri,
Rosi, e sciuri ci pari ca su.
Oh chi sorti a cui ama Diu!
Chi fortuna, chi felicità!
La caparra di gloria infinita
‘Ntra sta vita stu Diu ci darrà.
Si voi dunca truvari riposu,
Saldu amanti di paci tu sì,
Abbanduna lu munnu, ama Diu,
Cori miu, sta cuntentu accussì.
Tratto da:
DIARIU BREVI
Pri li cristiani idioti
NON INUTILI AD OGNI AUTRU
datu novamenti alla luci
DA MONSIGNURI
D. MARTINU URSINI
VISCUVU DI PATTI
AD USU DI LA SO DIOCISI